২০১২ চনৰ মে’ মাহৰ কোনোবা এটা দিন। ফ্ৰান্সৰ দক্ষিণ পূবৰ সমুদ্ৰ তীৰত থকা চহৰ নিচত (Nice) সপৰিয়ালে দুদিনৰ বাবে আছিলোঁ। নিচৰ সাগৰৰ পাৰ শিলাময়, বালিৰ সলনি কেৱল সৰু ডাঙৰ শিল। সাগৰৰ পাৰত কেইবাখনো ৰিজৰ্ট গঢ়ি উঠিছে। সাগৰৰ পাৰৰ ধুনীয়া ৰেষ্টোৰাবোৰ আমোদপ্ৰিয় ফৰাচী লোক সকলৰ বিনোদৰ স্থান।
নিচত আমি থকা হোটেলখন সাগৰৰ ওচৰতে। হোটেলৰ সন্মুখত এডোখৰ মুকলি ঠাই। আবেলিৰ পৰা বিভিন্ন নাচ গানৰ অনুস্থান সেই ঠাইত চলি থাকে। সৰু ল’ৰা ছোৱালীয়ে খেলিব পৰা ব্যৱস্থাও আছে। সন্ধিয়া সেই ঠাইত বহুতো মানুহৰ সমাগম হয়। সেই সময়ত ঠাইখনত এক উত্সৱমুখৰ পৰিৱেশে বিৰাজ কৰে।
উত্সৱমুখৰ পৰিৱেশ হ’লেও ক’তো হাই উৰুমি নাই। কোনো বিকৎ চিঞৰ বাখৰ নাই। সকলোৱে ভদ্ৰ ভাৱে অনুস্থান উপভোগ কৰিছে। অনুস্থান উপভোগ নকৰা সকলে নিজৰ মতেই ঘূৰি ফুৰিছে, ফটো তুলিছে। সকলো মানুহ যেন অতি শান্ত, নিৰ্জু প্ৰাণী।
সাগৰৰ পৰা অকণমান আঁতৰত এখন পাহাৰীয়া ঠাই আছে। ঠাইখনৰ নামটো অদ্ভূত, আমাৰ মুখত নুফুটে। পাহাৰৰ ওপৰলৈ যাবলৈ ৰাষ্টাত চলা ট্ৰেইনৰ ব্যৱস্থা আছে। আমি সেইখনত উঠি পাহাৰৰ ওপৰ পালোগৈ। তাৰ পৰা নিচ চহৰখন বৰ ধুনীয়া লাগে।
দ্বিতীয় দিনা ঘূৰি পকি সন্ধিয়া আহি হোটেল সোমোৱাৰ অলপ পিছতে শুনিলোঁ ৰাষ্টাত বিৰাট হুলস্থূল। শান্তিত থকা ঠাইখন হঠাতে যেন মুখৰিত হৈ পৰিল।
হোটেলৰ সমূখেৰে উচ্চ শব্দত হৰ্ণ বজাই বাইকৰ ৰেলী এটা গৈ আছে। বাইক আৰোহী যুৱক যুৱতী সকল আনন্দত উত্ৰাৱল হৈ আছে। বহুতৰে হাতে হাতে ফ্ৰান্সৰ পতাকা। কিছুমানে মুখা পিন্ধিছে। কিছুমানে গাই মুখে ৰং সানি লৈছে। তেওঁলোকৰ মুখত বিকৎ চিঞৰ বাখৰ। ফৰাচী ভাষা নুবুজো যদিও হয়তো তেওঁলোকে আমাৰ 'ইনক্লাৱ জিন্দাবাদ' জাতীয় কিবা কৈছে, তেনে লাগিল।
সাধাৰণতে শিষ্টতা বজাই ৰখা মানুহবোৰে এইদৰে আনন্দত মতলীয়া হোৱা দেখি আমি আচৰিত হ’লোঁ। সোধা সুধি কৰি গম পালোঁ যে ফ্ৰান্সৰ নতুন ৰাষ্ট্ৰপতি নিৰ্বাচিত হোৱাৰ বাবে তেওঁৰ সমৰ্থক সকলে এইদৰে বাইকৰ সমদল উলিয়াইছে। সোনকালেই গম পাইছিলোঁ ফ্ৰাচোঁৱা অ’লাণ্ডে নিকোলাছ ছাৰকোজিৰ ঠাইত ফ্ৰান্সৰ নতুন ৰাষ্ট্ৰপতি হিচাপে নিৰ্বাচিত হৈছে। বাইক আৰোহী সকলে প্ৰায় প্ৰতিখনতে আঁৰি লৈছে নৱ নিৰ্বাচিত ৰাষ্ট্ৰপতিৰ প্ৰতিচ্ছবি।
শান্ত, নিৰ্জু মানুহো ৰাজনীতিৰ পৰশত হৈ পৰে উন্মাদ। এয়া কেৱল আমাৰ দেশৰ কথা নহয়।
